पोखरामा 28 माझठानामा स्कुल बस दुर्घटना : चार विद्यार्थी र एक वृद्धसहित पाँच जनाको मृत्यु, १४ जना घाइते

अमृत अधिकारी , पोखरा, असोज २३। कास्कीको पोखरा महानगरपालिका–२८ कालिकास्थित ओख्लेको भिरमा स्कुल बस दुर्घटना हुँदा चार विद्यार्थी र एक वृद्धसहित पाँच जनाको मृत्यु भएको छ भने १४ जना घाइते भएका छन्। कालिका इङ्ग्लिस बोर्डिङ स्कुलको ग २ ख १४१७ नम्बरको बस सडकबाट करिब २०० मिटर तल खसेर दुर्घटना भएको हो। बसमा सवार १९ जनाकै उद्धार गरी उपचारका लागि विभिन्न अस्पतालमा पठाइएकोमा पाँच जनाको उपचारका क्रममा मृत्यु भएको प्रहरीले जनाएको छ। दुर्घटनामा मृत्यु हुनेमा करिब १२/१३ वर्षीया ममता तिवारी, १३/१४ वर्षीय असिम कँडेल तथा नामथर नखुलेका दुई बालिका रहेका छन्। उनीहरूलाई बिहान ८:३५ देखि ९ बजेसम्ममा चिकित्सकले मृत घोषणा गरेका थिए। त्यस्तै, सोही बसमा उपचारका लागि लिफ्ट मागेर सवार पोखरा महानगरपालिका–२८ निवासी ६५ वर्षीय बाबुराम तिवारीको पनि मृत्यु भएको छ। १४ जना घाइते, विभिन्न अस्पतालमा उपचार दुर्घटनामा घाइते भएकामध्ये तीन जनाको गण्डकी मेडिकल कलेजमा र ११ जनाको पोखरा स्वास्थ्य विज्ञान प्रतिष्ठानअन्तर्गत गण्डकी अस्पतालमा उपचार भइरहेको छ। गण्डकी मेडिकल कलेजमा उपचाररत घाइतेहरूमा पोखरा महानगरपालिका–२८ का १६ वर्षीया सृष्टि तिवारी, १६ वर्षीय शिसन थापामगर र १६ वर्षीय सौगात तिमिल्सिना रहेका छन्। उनीहरू तीनै जनाको अवस्था मध्यम रहेको जनाइएको छ। गण्डकी अस्पतालमा उपचाररत घाइतेमध्ये १५ वर्षीया अस्मी कँडेलको अवस्था गम्भीर रहेको छ। अन्य घाइतेहरूमा १४ वर्षीया स्नेहा गौतम, १३ वर्षीया सोनिया तिवारी, १३ वर्षीय अंकित पराजुली, १५ वर्षीया स्मृति खत्री, १६ वर्षीया स्नेहा तिवारी, १४ वर्षीया आकृति बुढाथोकी, १५ वर्षीया मेरिना तिवारी, १४ वर्षीया सुप्रिया आचार्य, १६ वर्षीय यमन मगर र बस चालक ५७ वर्षीय तुलबहादुर गुरुङ रहेका छन्। उनीहरूको अवस्था मध्यम रहेको विवरणमा उल्लेख छ। उद्धारमा खटिएका प्रहरी जवान पनि घाइते दुर्घटनामा परेकाहरूको उद्धार गर्ने क्रममा इलाका प्रहरी कार्यालय शिशुवामा कार्यरत प्रहरी जवान अर्जुन शाही पनि सामान्य घाइते भएका छन्। उनको पश्चिम क्षेत्रीय गण्डकी अस्पतालमा उपचार भइरहेको छ। दुर्घटनाको कारण खुल्न बाँकी रहेको छ। घटनाबारे प्रहरीले थप अनुसन्धान गरिरहेको जनाएको छ। स्रोत : प्राप्त प्रहरी विवरण तथा अस्पतालको विज्ञप्ति।